မိူဝ်ႈၼႆႉဝၼ်းထီႉ 4 May 2026 ႁွင်ႈၵၢၼ်လူင်ပၢႆးပၺ်ႇၺႃႇၶွင်ႇသီႇဢဝ်ၶိုၼ်းၸိုင်ႈတႆး လႆႈၸတ်းႁဵတ်းပၢင်ယိုၼ်ႈမွပ်ႈဢၢပ်ႈဝႂ်လုၵ်ႈႁဵၼ်းၸိူဝ်ႉၸၢတ်ႈၽၢၼ်ႇပူၼ်ႉၸၼ်ႉလႄႈႁူင်းႁဵၼ်း ပူၵ်းပွင်ၼမ်ႉၵတ်ႉၶူးၸုပ်ႈ (2) ၵႂႃႇယူႇယဝ်ႉ။ ၼႂ်းပၢင်ၵႅဝ်ႈဝၼ်းမိူဝ်ႈၼႆႉ မီးၽူႈယႂ်ႇၵူၼ်းလူင်၊ ၶူးသွၼ်မေႃသွၼ် ၊ ပေႃႈမႄႈလုၵ်ႈႁဵၼ်းလႄႈ လုၵ်ႈႁဵၼ်း ၶဝ်ႈႁူမ်ႈ (400) ၵေႃႉပၢႆ ယူႇယဝ်ႉ။

ၼႂ်းပၢင်ၵႅဝ်ႈဝၼ်းမိူဝ်ႈၼႆႉ ယူႇတီႈၼၢင်းလိူၼ်ၶမ်း ႁူဝ်ပဝ်ႈၼၢင်းယိင်းမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး လႆႈမွၵ်ႈလၢတ်ႈၶေႃႈၵႂၢမ်းပိုတ်ႇပၢင်ၵႅဝ်ႈ တိုၵ်းသူၼ်းလႄႈ ပၼ်ႁႅင်းၸႂ်လုၵ်ႈႁဵၼ်းၶဝ်တၢင်းသဵင်ႈ ၵဵဝ်ႈလူၺ်ႈလွင်ႈ ပၢႆးပၺ်ႇၺႃႇ ႁႂ်ႈလုၵ်ႈႁဵၼ်းၶဝ်ႁဵၼ်းသုင် သုင် ယူႇတီႈၸဝ်ႈၵဝ်ႇၵေႃႈလႆႈတိုၵ်းသူၼ်းလုၵ်ႈလၢင်းၸဝ်ႈၵဝ်ႇ သိုပ်ႇၶိုၼ်ႈႁဵၼ်းႁႂ်ႈယဝ်ႉၸၼ်ႉ တွၵ်ႇတိူဝ်ႇၵႂႃႇယူႇယဝ်ႉ။

ဝၢႆးၼၼ်ႉ မီးသင်ႇၶၸဝ်ႈလႆႈပၼ်ၶေႃႈပွၼ်ႈဢေႃႈဝႃႇတၼိူဝ်ၽူႈမႃးၶဝ်ႈႁူမ်ႈၼႂ်းပၢင်ၵႅဝ်ႈၼႂ်းဝၼ်း မိူဝ်ႈၼႆႉသေဢမ်ႇၵႃး မီးၽူႈယႂ်ႇၵူၼ်းလူင်လၢႆလၢႆၸဝ်ႈလႆႈမွၵ်ႇလၢတ်ႈၶေႃႈၵႂၢမ်းပၼ်ႁႅင်းၸႂ်လုၵ်ႈ ႁဵၼ်းၵႂႃႇယူႇ ၊ လိူဝ်သေၼၼ်ႉ ၽူႈၵွၼ်းႁူင်းႁဵၼ်းပူၵ်းပွင်ၼမ်ႉၵတ်ႉၶူး ၶူးၸၢႆးဢွင်ႇၶမ်း(ၶိုၵ်ႉ တွၼ်း) ၵေႃႈလႆႈမွၵ်ႇလၢတ်ႈၶေႃႈၵႂၢမ်းပၼ်ႁႅင်းၸႂ်လုၵ်ႈႁဵၼ်းလႄႈ ၽူႈမႃးၶဝ်ႈႁူမ်ႈပၢင်ပွႆးၵႂႃႇယူႇ ယဝ်ႉ။

ယူႇတီႈတၢင်တူဝ်ပေႃႈမႄႈလုၵ်ႈႁဵၼ်း ၊ တၢင်တူဝ်လုၵ်ႈႁဵၼ်းပူၵ်းပွင်ၼမ်ႉၵတ်ႉၶူးၸုပ်ႈ(2) ၊ တၢင် တူဝ်လုၵ်ႈႁဵၼ်း ႁူင်းႁဵၼ်းပူၵ်းပွင်တူင်ႇဝူင်းၵူၼ်း(CLC) ၊ တၢင်တူဝ်လုၵ်ႈႁဵၼ်းႁူင်းႁဵၼ်းၸၼ်ႉၵၢင် မွၵ်ႇလၢတ်ႈၶေႃႈၵႂၢမ်းၵႂႃႇသေ မီးၵၢၼ်မွပ်ႈယိုၼ်ႈဢၢပ်ႈပၼ်ဝႂ်ၽၢၼ်ႇပူၼ်ႉၸၼ်ႉၵႂႃႇယူႇယဝ်ႉ။

ပၢႆးပၺ်ႇၺႃႇတႆး